Tuesday, April 7, 2015
।।भासबोध।। १०६८ ते ११२२
परंतु 'पळणे' योग्य नव्हे ।
अपूर्ण ठेवोनि कर्तव्ये ।
न अधिकार ठेवण्या नांवें ।
ऐशास ! मजला राहील ।। १०६८
सणवार असे पर्वणी ।
एकत्र जमून ग्रामस्थ गृहिणी ।
झिम्मा, फुगड्या फेर धरुवि गाणी ।
गात होत्या मुक्तरवे ।। १०६९
आधुनिकतेच जरि पेहेरावांत ।
माया, ममता तीच उरांत ।
प्रगतं संकल्पना संगोपनातं ।
प्रत्यक्षांत उतरवे माता ।। १०७०
जिजाऊंनी घडविला शिवबा ।
ज्ञान-कर्मेंद्रियांचा देत ताबा ।
सुयोग्य गुरु अन मोकळ्या नभा ।
निष्णात केले सर्वतोपरी ।।१०७१
तुर्या नसलीच जर गाभ्यांत ।
चर्या असली जरि अस्तित्वांत ।
सूर्यासहि आणणे टप्प्यांत ।
तिला ! दुरापास्त ।। १०७२
तुर्या ! भाग जगण्याची असतो चौथा '
तुर्या ! महति तिची ऐका ।
तुर्या ! अस्तित्व सांभाळणारी नौका ।
भवसागरी ।। १०७३
तुर्या ! पायाचा पाषाण ।
तुर्या । अस्तित्वाचा प्राण !
तुर्या । कार्य, भाव, कारण ।
मनुष्यासी ।। १०७७
घट वरचा ! द्राव दृश्यमान ।
घट मधला ! द्रावासि झाकलेपण ।
घट तळाशि ! द्रावास सगळ्या आधार कोण ?
भंगला जर ।। १०७८
त्याकारणे निसर्गे तुर्या ।
निवारण्या भंग भया ।
जगण्यांस देते छाया ।
आशीर्वचतरुची ।। १०७९
इतके सोपे ज्ञान ।
देवोनि दृष्टांत, उदाहरण ।
कां न करिती कीर्तन ।
शिष्यगण, महंत ?।। १०८०
कसब मुळांत असल्याविणा ।
अर्थ नाही प्रशिक्षणा ।
साक्षरतेचे महत्व जाणा ।
सांगोनि थकला डेबू ।। १०८१
थांबले जरि वाचन श्रवण ।
मगज विचारांचे निधान ।
अखंड कार्यरत, राखते भान ।
जितेपण जोवरी ।। १०८२
आदि अंत न ज्याचा ठावे ।
त्यांसी कैसे संबोधावे ।
दशदिशांनी आपुल्या प्रभावे ।
निसर्ग खेळे 'बाहुल्यां'शी ।। १०८३
नश्वर म्हणजे नाशवंत ।
बुवा, बाबा असो वा महंत ।
त्यांच्याच नादी भयभीत ।
भाबडे लागती ।। १०८४
निसर्गाच्या विविध तऱ्हा ।
उध्वस्त करिती घरसंसारा ।
तेल घालोनि ठेवावा पहारा ।
लागतो नजरेचा ।। १०८५
पानगळ, पुन्हा पालवी ।
आषाढांत जळे नवी ।
श्रावणांत वाटे हवी हवी ।
सणवारांची बरसांत ।। १०८६
शरदातले टिपुर चांदणे ।
निरभ्र आकाशाचे लेणे ।
शिशिरांत हुडहुडीची आवंतणे ।
परतुनि येण्या शिलेदारा ।। १०८७
प्रीती, अक्षरांच्या वळणावर ।
आसक्ती शब्दांपल्याडल्या आशयावर ।
भक्ती लेवुनी साहित्यसंपदेचे पर ।
ज्ञानमार्गे झेपावी ।। १०८८
ऋचा, श्लोक आर्या, ओवी ।
गण-गौळण, लावणी आसमंत घुमवी ।
फटका, पोवाडा, वा मुक्तछंद, नवी ।
गीतांचीच रूपे अभंग ।। १०८९
वर्णन, निरूपण, निवेदन, कथा ।
निबंध, दीर्घांक, चरित्र, गाथा ।
समीक्षा, विश्लेषण वा ग्रंथा ।
संशोधनोत्तर मांडणी अनिवार्य ।। १०९०
जैसे, वर्णनहेतु निरीक्षण।
निरुपणपूर्व आकलन ।
दीर्घांक फुलविणे प्रसंगांतून।
उदाहरणार्थ ।। १०९१
समीक्षापूर्व बारकाव्यांचा अभ्यास ।
चरित्रासाठी जीवनानुभव विशेष ।
आशय करितो, गाथा, वा ग्रंथास।
आकलनयोग्य अध्याययोगे ।। १०९२
शुभ्र मेघमाला नभांत ।
अवतरू लागल्या तरंगता ।
झालर कृष्णवर्ण कडांत ।
हळुहळु होइल दृश्यमान ।। १०९३
मग बाष्फ उर्ध्वगामी ।
प्रवेशेल अंतर्यामी ।
जलकुंभावतार वर्षाग्रामी ।
दासच सांगोनि गेले ।
नाही कांही जर लिहिले ।
अनुभव व्यर्थ गेले ।
रोजचे अनमोल ।। १०९४
होतील प्रसवोत्सुक ।। १०९५
मेघडंबरांत गर्जेल गाज ।
घुमूलागतिल मृदंग, पखवाज ।
मधूनच कडाडेल वीज ।
उजळिंत अकाली झाकोळ ।। १०९६
आसुसले प्राणिमात्र ।
एकवटोनि मन, गात्र ।
उंचावतील शुष्क नेत्र ।
आभाळमाया टिपावया ।। १०९७
पुलकित होइल अवनी ।
धावत सेइल वर्षाराणी ।
भूमि, तरुवर उदंड पाणी ।
जडावेल आसमंत ।। १०९८
आधार ! चहुबाजूंनी असावा ।
आधार ! दशदिशांतुनि भासावा ।
आधार ! स्वत:च नसावा ।
निराधार ।। १०९९
जरा म्हणजे असतो शाप ?।
जरा जीवमात्रांसि आपोआप ।
जरा जीवनानुभवाचे रोप ।
वृक्षरूपी, वितरण्या छाया ।। ११००
अध्ययन, साधना, आकलनासाठी ।
अध्ययन, साधना, कृतिशीलतेसाठी ।
अध्ययन, साधना, स्पर्धेसाठी ।
जिण्याकारणे रोजच्या ।। ११०१
दातृत्व ! मुळांतले सहज ।
दातृत्व ! असावे निर्व्याज ।
दातृत्व ! सत्कर्मांची व्यर्थ गाज ।
टाळावी, हेतुपूर्वक ।। ११०२
पंचमहाभूतांना वेसण ।
वैज्ञानिक संशोधाने प्रयत्न ।
हेचि प्रार्थना पूजन ।
अज्ञात शक्तिचे ।। ११०३
अजाणतेपणी पुष्प-बुक्कादि उधळणे ।
उपास सायास, नैवेद्य अर्पणे ।
अभावदेव प्रसन्नता प्रतीक्षिणे ।
फोल अनादिकाळापासोनी ।। ११०४
'चमत्कार' होती फसवणूक ।
निरक्षरांची अप्रत्यक्ष पिळवणूक ।
करीत होते भोंदू अध्यात्मिक ।
सर्वदा सदा ।। ११०५
गुरु करितो ज्ञानवृध्दी ।
गुरु वारी आपदा, व्याधी ।
गुरु देतो शिकवण साधी ।
प्राप्त परिस्थिति रिचविण्या ।। ११०६
गुरु तम भेदी अज्ञानाचा ।
गुरु परिचय देई पंचमहाभूतांचा ।
गुरु आग्रही कृतिशीलतेचा ।
सत्कर्मांसाठी ।। ११०७
गुरु जाणतो शिष्यमति ।
गुरु साधतो योग्य गति ।
गुरु वृध्दिगत ग्रहणशक्ती ।
करितो प्रमाणांत ।। ११०८
गुरु मार्गदर्शक सखा ।
गुरु विपदेस विन्मुखा ।
गुरुसि घाला हाका ।
प्रकटेल हात देण्या ।। ११०९
गुरु अंतर्बाह्य विवेक ।
गुरु सत्प्रवृत्ती, जनक ।
गुरु अशिष्यासि पावक ।
सजग सदा ।। १११०
गुरु ज्ञानगंगेचा उगम ।
गुरु शिकवी भेद, दंड, साम ।
गुरु आदर्श मानव राम ।
पाहावा सदा ।। ११११
गुरु रूपधारी कोणीही ।
गुरु मित्र, वैरी, शार्वीलिकही ।
गुरु, निसर्गाची वही ।
पंचमहाभूती ।। १११२
गुरु वेधतो शिष्योत्तम ।
गुरु सर्वांवरी करि प्रेम ।
गुरु उध्दरण्या सक्षम ।
मूढांसीही ।। १११३
गुरुवर असावी निष्ठा ।
गुरुचि प्रदान करितो प्रतिष्ठा ।
गुरु ज्ञानामृताच्या घटा ।
दडवित नाही कधिही ।। १११४
गुरु भीम, बलवान महारुद्र ।
गुरु शिष्यगणा सुभद्र ।
गुरु तर्क-बुध्दि-आकलन समुद्र ।
जीवमात्रा ।। १११५
मी एक प्रस्तरखंड ।
शेंदुर चढविति विनाखंड ।
अंकुरू लागला भयगंड ।
मांदियाळी अंधश्रध्दांची जमेल ।। १११६
शब्दांच्या प्रेमापोटी ।
केवळ उघडितो अनुभवकोठी ।
आशयाची रेटारेटी ।
टाळोनि न टळें त्यांत ।। १११७
शिष्य व्हावा यशस्वी ।
म्हणोनि त्यांसि शिकवी ।
अध्ययन अध्यापनापूर्वी ।
करि गुरु विषय-आशयाचे ।। १११८
परंतु परीक्षाकाळी ।
साहाय्यास जाणे जवळी ।
यशोमाला पडावी गळी ।
म्हणोनि ! हेतू अनिष्ट,अश्लाघ्य ।। १११९
अध्ययनार्थ उच्चश्रेणी वर्गांत ।
जर असला धडे घेत ।
कस त्याचा जोखण्यांत ।
सहभाग कनिष्ठाचा कां बा ?।। ११२०
गुरुसि मिळत नाही सवड ?।
की लोळत पडण्याची आवड ?।
मग ज्ञानार्पण, अध्यापनाची कावड ।
घेवोचि नये ऐशाने ।। ११२१
ऐसे धुंडाळोनि खेचा ।
जनक्षोभ मुसळाने ठेचा ।
जखडा ऐशा घालोनि पेचा ।
कि सुटो नये ।। ११२२
Subscribe to:
Post Comments (Atom)
No comments:
Post a Comment